الرئيسية
أحدث الصور
المنشورات
من طرف كثيرا ما نسمع عبارة لولا جراده ما وقع عصفر
تعالوا لنقرأ القصه
كان يا ما كان ، نحكي ولا انام ، ويقولوا الاطفال نحكي .تعالوا لنقرأ القصه
وحدوا الله ويرددون لا اله الا الله .
كان في هوني الا هالزلمة ومرتو ، وما حيلتهن حيلة ومش لاقين العشا. وفي يوم من الايام ، قالت لو مرتو :
يا ابن الحلال البس شيخ وصير افتح 1ل الناس ، و اتكل على الله ، بلكي 2الله فتح علينا .
وسمع الزلمة كلمة مرتو ، ولبس شيخ ، وحمل مسبحة الدراويش 3 ، وصار يفتح للناس ، وكل واحد يفتح لو يحط بأيد الشيخ قرشين ، ييتعيش فيهن .
وصار الشيخ مشهور ، وكل الناس تفتح عندو .
وسمع الملك عن الشيخ وقال بدي اجرب هالشيخ ، واشوف بعرف يفتح عن صحيح ، ولا بضحك ع الناس .
وجاب الملك جرادة وعصفور، وحط كل واحد تحت سطل 4 ، وقال ل الوزير ، جيب الشيخ ، تانشوف بعرف شو تحت السطل ولا لأ .
وراحت العسكر، وجابت الشيخ ، والشيخ يرجف من الخوف .
وقال الملك يا شيخ ، اذا عرفت شو تحت السطل جازيناك ، واذا ما اعرفت قطعنا راسك .
وكان اسم الشيخ عصفور ، واسم مرتو جرادة .
وهو سمع كلام الملك ، صار يفرك ايديه ويرجف من الخوف. واتذكر انها مرتو السبب في وقوعو في المصيبة ،وهي اللي قالت لو يلبس شيخ . وقال :
حكايـا شكايـا شرحهن بطـول
لـولا جـرادة ما وقع عصفـور
وعندما سمع الملك كلام الشيخ ، صاح على طول حسو 5 ، صحيح انك شيخ بحق وحقيق ، وعرفت اللي تحت السطل ، وأمر الملك ب رفع السطل ، ورفعوا السطل الأولاني ، ولقيو تحتو عصفور ، ورفعوا السطل الثاني ولقيو تحتو جراده ، متل ما قال الشيخ .
وانعم الملك ع الشيخ ، وروح ع الدار حامل عطية الملك وقال لمرتو رحتي6 اتموتيني ، وحكا لها اللي صار معاه عند الملك ، وقال لها ، لو الملك بعرف انو اسمي عصفور ، وانو اسمك جرادة ، كان قطع راسي ، لكن بحسبني شيخ وبكاشف 7، وقالت المرة : ربنا بستر.
وفي يوم من ذات الايام ، طلب الشيخ من مرتو أكلة مجدرة برغل ، وقامت المرة ، جرشت البرغلات ولا الدق ع الباب ، وفتح الشيخ الباب ، ولا عسكر الملك بقولوا لو ، الملك طالع ع الصيد والقنص ، وبدك اتروح معاه
وراح الشيخ مع الملك ع الصيد و القنص ، وبعد ما خلصوا صيد ، قعدوا ع ظهر المغارة ، والعبيد صارت اتحضر السفرة . وصار الشيخ يفكر بالمجدرة اللي ابتطبخها مرتو ، واللي جاي ع بالو ، وصار يعمل متل ما عملت مرتو وهي ابتطبخ المجدرة . وصار يجرش ، مثل ما مرتو جرشت البرغل ع الجاروشة .
وصار بنسف ، مثل ما نسفت مرتو البرغل بعد ما جرشتو وشعل الحطب ، وصار ينفخ عليه ، متل ما مرتو شعلت الحطب في الموقدة وحط القدر ع النار ، وسلق العدسات ، وسقط البرغلات ع العدسات ، وصار ، وصار يفرم مثل ما مرتو فرمت البصل، وقلاه ، وقفر المجدرة .
والملك وحاشيتو يطلعوا عليه، وكل واحد يقول في عقلوا ، ابصر شو بعمل الشيخ ، والكل محترم الشيخ ، وناصت تا يشوف شو بدو يعمل.
وبعدين اتصور كيف مرتو دارت المجدرة في الصينية ، وقام يركض ، بدو يروح ع الدار ياكل مجدرة .
وركض الملك ورا الشيخ ، وركضت الحاشية ورا الملك ، وقالوا ابصر شو بدو يصير . وما لحقوا يبعدوا عن المغارة الا المغارة هايله . وحسب الملك انو الشيخ كان يفتح ، وهو عرف انها المغارة بدها اتهيل وهرب ونجَى الملك وحاشيتو من الموت .
و أنعم الملك ع الشيخ اللي حسبو نجاه من الموت .
وروح الشيخ ، وقال لمرتو ، خذي ، هاي رزقتنا، لكن بدنا نرحل عن البلد ، بكره الملك بكشف حقيقتي وبقطع راسي . ورحل الشيخ ومرتو عن البلد ، وعاشو في رزقتهن اللي الله قسمها الهن .
وثاني يوم بعث الملك بطلب الشيخ ، ولقيه راحل ، وظلت حقيقة الشيخ سر وما عرفهاش الملك ، وظل الملك يذكر الشيخ بالخير .
توتي توتي فرغت الحدوتي مليحـة و لا ملتوتـة
مع تحياتي / عايد محمد ابو فرده
» عضو من عائلة أبو هاشم بمصر
» مربعانية الشتاء
» ونذرت شعري للمسرى
» عايد أبو فردة يشهر كتابه «ديوان السامر الفلسطيني»
» "وادي الكلاب".. خربة لا ترى النور ---- قرية الصرة
» طموح مواطنو قرية الصرة في دورا - الخليل
» دعاء لشهر ذي الحجة 1437
» صورة وجهاء عائلة أبو هاشم
» اثناء العمل ... فارس طه ابو هاشم