قصة الحطاب

الحطاب

كان في هون الا هالحطاب ، الو ابن . كل يوم الحطاب يحمل الفاس وزوادتو وروح يحطب . ويشتري بحق الحطب خبزات يطعم اولادو .
وهو كبر ابنو صار يروح معاه عالحطب . وفي يوم والحطاب وابنو بحطبو . اشتت الدنيا . وفات الابن ع هالمغارة من الشتا . اطلع هيك ولا طاسة وطاقية وناي محطوطين في قرنة هالمغارة . حمل الناي وضرب عليها ، ولا هالجنود واقفين قبالو، وقالو لو " لبيك عبيدك بين اديك " .
خبا الناي في جيبو ، ولبس الطاقية ، وخرج من المغارة ولقي حوض هالمية ، صار يغرف من المية في الطاسة والمية اللي بغرفها اتصير ذهب ، وراح وقف قدام ابوه ، وهو لابس الطاقية لكن ابو ما شافوش . وعرف الولد انها طاقية اخفا .
والمغرب بعد ما اتعشوا قال الولد لأمو بدك تخطبي لي بنت الملك ، وقالت لو امو كيف بدي اخطبها ، وين هي وين احنا ، لكن الولد ظل يلح عيلها . راحت الام وقفت باب القصر اول يوم وثاني يوم ما صحلهاش اتفوت . وثالث يوم قال الوزير للملك في مرة فقيرة ومحتاجة الها ثلث تيام ابتيجي ، وبصحلهاش اتفوت وامر الملك الحاجب يفوتها .
وقفت قدام الملك وقالت ، انا جاي اخطب بنتك لابني ، وقال الوزير اطردها يا ملك . لكن الملك قال بطردها بالسياسة .
وقال الملك انا بعطيك بنتي لكن مهر بنتي مئة رطل من ذهب . ورجعت مرة الحطاب عالدار . وحكت لأبنها . وقلها ابنها لا تخافيش ، الذهب موجود ، واخذ الطاسة وراح ع حوض المية . وظل يغرف من الحوض تا وفا مئة رطل ذهب . وقال لأمو ، روحي قولي للملك ، اكياس الذهب في باب دارنا ابعث ناس اتجيبها .
وراحت مرة الحطاب للملك ، وقالت لو مثل ما قلها ابنها ، وبعث الخدام وجابو الذهب . وانبهت الملك والوزير من شوفة الذهب . وسأل الملك مرت الحطاب منين الذهب ، وقالت لو من ابني .
لكن الملك طلب منها طلب ثاني وقال ، بدك اتجيبي ل بنتي ثلث بدلات ، تيجي ع قدها من غير ما تشوفيها .
وحكت مرة الحطاب لابنها عن طلب الملك . وضرب ابنها ع الناي ، واجت الجنود ، وطلب منهم ثلث بدلات على قد بنت الملك ، وبرمشة عين الا البدلات قدامو .
ثاني يوم حملت مرة الحطاب البدلات ، واخذتهم للملك ، وكانو ع قد بنت الملك ، لا زايدين ولا خاسين . واستغرب الملك وعرف انهم قادرين وقال ، بدي لبنتي قصر يكون قبال قصري ومثل قصري وجميع ما هو اب قصري موجود فيه وكون ناجز بأربعة وعشرين ساعة .
وراحت المرة وحكت لابنها ، وضرب ابنها ع الناي وطلب من الجنود القصر ، وتاني يوم الصبح قعد الملك من النوم ، ولا هالقصر قبال قصرو مثل ما طلب الملك .
وانجبر الملك يعطي بنتو . ووصى بنتو تعرف لو سر العاريس ، وانتقلت العاروس من قصر ابوها ل قصر العاريس . وفرح العريس اللي الملك اعطاه بنتو . وقعدو يتخرفوا ، وسألتو كيف جاب الذهب . وحكى العريس للعروس كيف جاب الذهب . ونص الليل اخذت بنت الملك الطاسة ورجعت ع قصر ابوها . وفرح الملك بالطاسة ، وحسب انو الولد ما عندوش غيرها .. وفرح بخلاص بنتو ..
والصبح قعد العريس من النوم ما لقيش العروس ، وضرب على الناي وطلب من الجنود الي طلعوا يهاجموا القصر ويجيبو عاروستو . وهاجمت العساكر القصر ، ورجعوا العروس ل عريسها . وفي السهرة سألت العروس العاريس عن العساكر وحكى لها عن الناي . ونص الليل اخذت الناي وراحت على قصر ابوها . والصبح قعد العريس وما لقيهاش ، وعرف انها اخذت الناي مثل ما اخذت الطاسة ع قصر ابوها .
واجا اشترى جلد جمل ولبسو . وعمل لحالو قرون طويلة ، وجاب عصا حديد والها جراس ، ولبس طاقية الاخفا ، وفات عالقصر وقف قدام الملك وشلح الطاقية وكانت شوفتو بتخوف ، وصار يهز بالعصا ولجراس أدق . وقال للملك اذا ما اعطيتنيش مرتي بتموت انت والوزير . خاف الملك واعطاه مرتو وادعت بنت الملك انها بتحب جوزها وعسكر ابوها اللي برجعوها لأهلها . وسدق ابن الحطاب حكي مرتو.
وسألتو كيف فات عالقصر . وحكى لها عن الطاقية ونص الليل اخذت الطاقية ورجعت على قصر ابوها .
والصبح ما ليقهاش ، وعرف انها رجعت ع قصر ابوها ، وخرج وصار يمشي في الصحاري مثل المجانين . وشاف شجرة تين حاملة من غير اوان . اكل حبة تين ولا طالع لو قرون مثل قرون التيس وصار يشد في القرون تا يقلعها ولا يكسرها ما عرفش . وشاف تاني شجرة تين ، واكل من تينها وفقد القرون وما لقيها .
وهو شاف هالشوفة قال آه انا بدبر الملك ، ولقط تين من الشجرة اللي ابتعمل قرون وحطو في سلة ، وفي السلة الثانية حط من الشجرة الثانية . وظل يمشي تا وصل قصر الملك ، وصار ينادي ، تين ، تين ، يلا تين.
وسمع الملك صوط البياع ، واستغرب وجود التين في الشتا ، وامر الخدم يحضرو بياع التين . وباع التين اللي بعمل قرون للملك ، واكل منو الملك والوزير ، وصار لهمم قرون . وقال الوزير للملك ، يا ملك الزمان ، بدي اقول لك كلمة ، اعطيني الامان ، قالو الملك عليك الامان . قال الوزير ، يا ملك الزمان الك قرون ، وقال الملك ، وانت يا وزيري الك قرون .
وقعد الملك كل واحد في قصرو ومنعوا الناس اتفوت عليهم ، وعيوا الطب والدوا لكن القرون ظلت ما راحتش . وصارت المملكة فوضى من غياب الملك والوزير عن الرعية .
وراح ابن الحطاب واخذ معاه التين اللي من الشجرة الثانية ، وراح عند الملك وقال ، اذا بترجعولي الطاسة والناي والطاقية والمرة بشفيكم من القرون . ورضي الملك يرجع لو كل اللي طلبو . وأطعموا ابن الحطاب من التين وراحو القرون ، واخذ الطاسة والناي والطاقية والمرة . وصار ملك البلاد وامر الملك الجديد الملك القديم اصير راعي مثل ما كان هو راعي .
وتوتي توتي فرغت الحدوته مليحة ولا ملتوتة .