شوال الهم / 7 لوازم حفلة العرس

شوال الهم
مجموعة من المشاهد المسرحية الملتقطة من المجتمع المحلي
جمعها وصورها ووضعها بين دفتي كتاب
الداعي بالخير صالح صلاح شبانة
المشهد السابع / حالة ولاده في مستشفى حكومي
الممثله : الله يعين اللي عنده حمار شاموص مثل حماري ...!!!
الممثل : ويعين ربنا اللي بده يسومه ويفكر يشتريه ويصير في اللي صار فيّ ..!!
الممثل1 : بس انا ما صدقت فيها وانا اصير حمار .. صفيت حساباتي القديمه معك ..!!
اللمثله : ( تضحك ) انت عضيته ورفسته عن جد ولاّ تمثيل..؟؟!!
الممثل 1 : الله يسامحك .. هو التمثيل بنفع ؟ كيف لعاد بدنا نثبت للناس اننا صادقين ؟؟؟!!
الممثل 2 : مشان تطلع صادق لازم تحط في ّ عاده مستديمه ؟؟
الممثله : ( ضاحكه ) يالله يا جماعه .. نعيش ونوكل مقالب من بعضنا ..!!
الممثل 1 : والمشهد اللي جاي في مستشفى حكومه ، الست بدها تولد .. ، خلينا نشوف جزء او واجهه من واجهات العاملين في الطب الحكومي والناس ..!!
الممثل 2 : ومع ذلك احنا بنقول الله يعطيهم العافيه ويمدهم بالقوه .. وكل عمل ايجابي بقوموا فيه هذا واجبهم وبقبضوا حقه رواتب .. واحنا النا في السلبي ..!!
يتفرق الممثلون الثلاثه .. (يحضرون الستاره الطبيه ) ، ( الممثله تضع على بطنها وساده صغيرة ويساعدها الممثل بربط الوساده على بطنها بواسطة منديل )...!!!
( الممثل 2 يجلس وراء الطاوله .. )..(تتكئ الممثله على زميلها ـ زوجها ) . ( يسيران )
الممثله : ( تتأوه وهي تمشي بتثاقل ) آه يا يمه .. آه يا بوي .. آه كل اهلي .. قتلني الوجع .. الله يقطع الحبل ويومه ..!!
الممثل 1 : اصمدي وشدي عزمك .. فرج الله قريب ..!!!!
( يصلان الطاوله ..) ( الممثل (لاستعلامات)غير آبه بهما ..)
الممثل 1 : ( يطرق على الطاوله ) .. يا اهل الله .. يا ساتر يا كريم ..!!
الممثل 2 : ( بتثاقل وملل ) نعم .. اي خدمه ..؟؟!!
الممثل 1 : ( يشير الى بطن زوجته ) مش شايف بطنها طالع من حلقها .. بدها تولد .. !!
الممثل 2 : ( بعصبيه ) شايف .. شايف .. وشايف من موديلها كثير ..!!
الممثله : مالك هبرت فينا مثل الكلب المسعور ؟؟!!
الممثل 2 : ( يصرخ بوجهها ) هو تناوليني بكفين ثلاثه ..!!
الممثل 1 : يا عمي لا بدها تتناولك ولا على بالها ..بدنا تيسّر لنا الاجراءات ..!!
الممثل 2 : اي اجراءات ؟ معك وحدة دم ؟
الممثل 1 : وحدة دم ليش ؟ المره جايه تولد مش تعمل جراحه ..!!
الممثل 2 : ( بعصبيه ) تولد ، تعمل جراحه ، تعمل غراب البين ، هذا الحكي ما بخصني ولا بعنيني ( يدق على الطاوله بعنف ) في انظمه ، في قوانين ، في لوائح ، واللي مش قد الكحيله وعليقها يحيد عن طريقها ، اللي ما بتقدر تولد في مستشفى تروح تشوف لها طابون تولد فيه ، وحلوا عنا عاد ..!!!
الممثله : ( لزوجها ) هو خليني الوحه بوكس اطيّر طارة نيعه ...!!!
الممثل 1 : ( بتوسل ) لا .. دخيلك .. اسأل مجرب ولا تسأل طبيب .. بكفي انا بتلوحيني وعارف طعم لوحاتك ..!!!
الممثله : ( للاستعلامات ) صرت جايبه عُر قواريط عمرهم ما طلبوا مني دم .. وبعدين انا مستويه جاهزه .. جايز اولد قدامك هون ..!!
الممثل 2 : ( بلا اهتمام ) تولدي هون تولدي هناك تولدي في جهنم مش شغلي هاتوا وحدة دم بتولدي جوه ، ما في وحدة دم هوّونا ..!!!
الممثله : ( لزوجها بغضب ) انا وصل الدم لراسي .. جاي على بالي الوحه ..
الممثل 1 : ( يبعدها ويقف بينهما ) بلاش ، مشان الله بلاش ( للاستعلامات ) خليك محضر خير ، وسهلها الله يسهّل امورك . هذي ان هددت نفذّت وان نفذّت كسرت حنكك وخربت بيتي بالرفع ..!!!
الممثل 2 : ( يصطنع الهدوء ) يا عمي الله يهديك ، انا مجرد موظف .. ومش اي موظف ، انا شرشوبة خرج ، انا طرطور ، انا منفذ اوامر .. تعال باجي ، روح بنقلع .. اللوائح بتقول وحدة دم يعني وحدة دم ...!!!
الممثل 1 : الله وكيلك امها خلّفت عشره ، عمرها ما مزطت واحد منهم على فرشه .. كلهم اجو في الموارس والحواكير وهي تشتغل ...!!!
الممثله : بقت تمزط الولد وتقطع سرته بحجر وتعقدها وتشتله في حضنها وتحمل حملة الحطب ولاّ تنكة الميه وتروح مثل الغزاله ..!!
الممثل 2 : انا ما بهمني هالحكي .. اللوائح بتقول وحدة دم ، يعني وحدة دم ..!!
الممثل 1 : طيب جيب وحدة دم من بنك الدم واحجز هويتي عندك ، واذا استعملت لها وحدة الدم انا بتبرّع بدالها ، أو بجيب لك وحده من تحت طقاطيق الأرض .. ما استعملتها بترجع لبنك الدم ...!!
الممثل 2 : ( بصبر فارغ ) وحدة دم يعني وحدة دم .!!
الممثله : ( تصرخ صوتاً من الالم ) .. آخ يا بطني آخ يا ظهري .. الطلق موّلع معي ..وايدي سخنت ، خلوني ألوحه بوكس أطير اسنانه ، وبولد في السجن ، أكيد هناك الرعايه أحسن ...!!!
الممثل 1 : ( بارتباك ) يا رجل استهدي بالله وسهل لنا المهمه الله يجزيك الخير ..!!!
الممثل 2 : وحدة دم يعني وحدة دم ...!!!!
الممثل 1 : افرض انا جبت لك وحدة دم ، وما احتاجت المره الها .. بترجع لي اياها ؟
الممثل 2 : اللي بفوت عنا ما بطلع ، بنحولها على بنك الدم ..!!
الممثل 1 : ( بفارغ صبر ) تعرف انك زلمه مش مصلي عَ لنبي .. يا ابن الاوادم انت مش من هالبلد ؟ انت بتجهل عاداتنا وتقاليدنا ؟
الممثل 2 : والله حافظها بصم ، بس المشكله اذا سهلت مهمتك بتوقع في راسي انا .. انا موظف ، بنفّذ الاوامر وبربط الجحش محل ما بده صاحبه . والجدل معي مضيعه للوقت .. وحدة دم يعني وحدة دم ..!!
الممثل 1 : ( لزوجته ) لوحيه واحرقي امه في عزا ابيه ..!!
الممثله : تهجم عليه فيفر من امامها .. !!


http://www4.0zz0.com/2010/03/27/12/668939012.jpg
الداعي بالخير
صالح صلاح شبانة

http://turath.mo5ayam.com/vb/index.php
منتديات سنجل الباسلة
الموقع الشخصي للكاتب والباحث صالح صلاح شبانة

هذا الرابط لموقع شخصي وخاص ، وهو محاكاة للتراث الشعبي حسب وجهة نظر الكاتب ، وقد يطلق عليه التأريخ الأبداعي ، وهو يختص بتراث القرية الفلسطينية من وجهة نظر أهل سنجل ، أرجو وأتمنى منكم عدم حذف الرابط بذريعة قوانين المنتدى ، وأرجو من القوانين القفز عن هذا الرابط لما فيه من تواصل بين أبناء الشعب الفلسطيني المهَجّرين ، ولكم التحية .