مجموعة من المشاهد المسرحية الملتقطة من المجتمع المحلي
جمعها وصورها ووضعها بين دفتي كتاب
الداعي بالخير صالح صلاح شبانة
المشهد الخامس : لوازم حفلة العرس
المرأة : ومثل ما شفتوا جوزي ، او اللي كان في المشهد جوزي عاف المائة دينار
الرجل الحرامي : وصار فيّ مثل مصيفة ريحا .. لا سرقه سرقت ، ولا كسبت الجائزه ..!!!
أبو حسن : لا تلوموني يا ناس .. القرد في عين اهله غزال .. وعلى رأي المثل شافت الخنفسه بنتها عالحيط قالت حبة لولو مدليه بخيط ..!!!
معاً : سبحان الله .. غريزة حب الاهل للأولاد ..!!!
الرجل /1:وهلقيت عنا مشهد .. الله يخليلكم .. وانا وبنت هالحلال ( يشير إلى الممثله ) ..
اتجوزنا من سنــــــــــــــــ25ــه .. وعنا الله يعطي كل مشتهي عُر اولاد وبنات ..!!
وابننا الكبير بده يتأهل .. وبدنا نعمل له حفلة عرس .. وبدنا نروح على متعهد افراح نحضّر للعرس ..!!
يهرعون ، يضعون طاوله وخلفها كرسي وامامها كرسيان .. يجلس الرجل/2 وراء المكتب ويضع على عينيه نظاره قراءه ويبدو منهمكاً بالعمل ..
الرجل /1 : ( يمشي وزوجته ) شدي عصبك ، مرخرخه وحالتك حاله ..!!
المرأة : (بدلال) : الله يكسرك ، مش ختيرنا وبدنا نكنن ؟؟!!، وبكره بنصير أنا واياك جدود ؟؟
الرجل/1 : أنا اللي بقول لي يا سيدي ، بتناوله على ثمه وبكسره كسر ، وبلعن ثم أمه بعزا أبوه ..!!!
المرأة : (بدهشه) : الله يكسرك ، وليش ؟؟
الرجل /1 (بغرور) : مشان أظل شيخ الشباب ..!!!
المرأه : (بامتعاض) : الله يقطع الشباب اللي انت شيخهم ..!!!! انت شيخ المهبرتين ، اللي عدادهم قالب ، اللي زمانهم الأفتراضي خالص ..!!
الرجل /1 : (بغضب) : حليمه ..!!! صلي على النبي ولمي حالك ..!!!
المرأة : (تبتسم بجذل وتضربه بكوعها) انت خلي الطابق مستور استر إلي وإلك ... ما احنا دافنينه سوا ..!!!
الرجل /1 : (يهدأ غضبه) ، (يتمتم بكلمات غير مسموعة) ، (يتجهان نحو الرجل المتعهد)
معا : السلام عليكم .
المتعهد : (ينزع نظارة القراءة) وعليكم السلام ورحمة الله وبركاته (هاشا) أهلا وسهلا ، أهلا وسهلا ، شرفتونا يا جماعه..!!
معا : الله يزيدك شرف ..
الرجل / 1 : والله يا اخونا بدنا لوازم هالفرح .. عقبال عندك بدنا نجوز هالصبي ..
المتعهد : ( بحماس ) حلت البركه ، ترى اوصلتوا المحل الصحيح .. طبعاً بدك صيوان وكراسي وطاولات وحبل اضويه مش هيك ؟
المرأه : بس حبل الاضويه بدنا اياه ملون .. ومن اللي بغامز ..!!
المتعهد : موجود يا اختي على راسي من فوق ( يكتب ) هذا صيوان .. وقديش كراسي ؟؟
الرجل : قول ثلاثمائة كرسي وخمسين طاوله زغار وعشر طاولات كبار ..!!
المتعهد : بصير .. وشو كمان بتأمرونا ؟
الرجل : مثل ايش يعني ؟
المتعهد : مشان السهره بدك دي جيه ولاّ فرقه ؟
الرجل : شو رأيك أنت ؟
المتعهد : انا تحت امرك عندي هذي وهذي .. وكل عروس الها مهرها .. يعني عندك مطرب صوته حلو وحنون ومطرب صوته جاعوري وكل واحد الو سعر ..!!!
المرأه : عزا في دارك ، والمطرب الجاعوري شو بدنا فيه ؟؟!!
المتعهد : شوفي يا اختي .. انتي مشان تعملي عرس معتبر لازم الناس يظلوا يحكوا فيه لازم تعملي نهفه .. ترى عرس بلا هوشه وما يروح عشره عَ المستشفى وقدهم عَ السجن هذا لا هو عرس ولا بسوى اشي ..!!!
المرأه : ( ترتعد ) الله يكفينا شرك .. مستشفى ايش وسجن ايش ؟؟؟
المتعهد : والله يا اختي انا بعرض بضاعتي وانت اختاري واحنا تحت امرك ..!!!
الرجل : بس المطرب الجاعوري شو بدنا فيه وكيف بنقدر نسمعه ..؟؟
المتعهد : احنا عنا سماعات بنلعب بصوت المطرب مثل ما بدنا ، بس هذي لازم تبقى عاليه ومزعجه لأنك اذا وطيت الصوت كشفت عيوب المطرب ..!!
المرأه : واذا انكشفت عيوب المطرب شو بده يصير ..؟؟!!
المتعهد : بقوموا عليه الشباب بدقوه قتله .. بفزعوله جماعته .. صارت هوشه .. ضرب خبط .. تكسرت الكراسي والطاولات والاضويه .. ناس راحوا عَ السجن وناس عَ المستشفى .. دخل عرسكم التاريخ ..!!!
الرجل : الله يقطع هيك تاريخ وربنا يكافينا شرك .. وبعدين ؟؟؟
المتعهد : السهره بدها طخ .. مش هيك ؟؟!!
الرجل : ( منتفضا ً) والله اللي بطخ طلقه لامسح الارض فيه ، وأنا براسي غير أشحطه على الشرطه ..!!
المتعهد : رضيت زعلت دقيت راسك بالحيط بدهم يطخوا .. شو بدك تعمل ..؟؟
الرجل : حسبنا الله ونعم الوكيل .. الله يكفينا شر بني آدم ..!!!
المتعهد : انا عندي الحل الأمثل ورح تدعيلي من كل قلبك ..!!
الرجل : هات تنشوف .
المتعهد : انا عندي فرقه طخيخه ، يعني بطخوا بفن وبراعه ومدربين ، وبعدين مأمنين تأمين شامل ، أي واحد بنقتل او بنجرح رح تتولى أموره شركات التأمين ، وبعدين اذا وحده قرفانه جوزها .. واحد عنده عدو مبين ، بدزه بوديه عَ العرس .. بتروح رصاصه عميا طاقيته بروح موّدع .. وهمه بقبضوا التأمين ويا دار ما فاتك شر..!!!
المرأه : ( تنهض بغضب ) ( لزوجها ) قوم يا زلمه انا صرت متشائمه ..!!
الرجل : ( ينهض ) وهو على رأيك .. سد نفسنا عن الفرح ..!!
المتعهد : ( برجاء ) تفضلوا استريحوا ، بس انا زلمه بعرض خدماتي .. اذا ما بدك خدماتي قول اللي بدك اياه وانا تحت امرك ..
الرجل والمرأه : ( يجلسان وهما يتأففان ) ..!!!
الرجل : هات تنشوف شو عندك كمان ..!!
المتعهد : عندي يا سيدي الفارده .. انا ممكن اقدملك القلاب ابو ست روس .. وممكن اقدملك سيارة اسعاف او سيارة نقل الموتى ..!!!
المرأه : ( تنتفض ) اعوذ بالله من غضب الله .. قوم يا زلمه ..!!
الرجل : ( بهدوء مصطنع ) خلينا نلاحق العيار لباب الدار .. ليش القلاب ؟
المتعهد : الموضه الدارجه صار قلاب يطلع قدام سيارة العروس عليه عشر خمسطعشر زامور هوا .. مشان يزمر قدام الفارده .. صوت الزوامير يعني بسمّع اهل البلد والضواحي المجاوره وكل الناس يعرفوا انها الفارده طلعت ...!!
الرجل : والاسعاف ولاّ نقل موتى الله يكفينا شرك ، ليش ؟
المتعهد : هذول الشباب دمهم حامي ، بطلعوا حالهم من الشبابيك .. وبعدين بصيروا يزاحموا انوه بده يمشي ورا سيارة العروس .. بتبلش السيارات تزاحم وتزحط ، جايز حدا ينط من شباك ولاّ هو تحت اعجال السياره اللي وراها .. يروح فغيص فطيس اللي بدك اياه .. اذا فيه نفس عَ الاسعاف ، واذا مودّع على سيارة نقل الموتى ..!!!
المرأه : امانة الله عليك هيذ الاعراس صايره في بلدنا ؟؟
المتعهد : وشو شايفه .. وشو بدي اقول لما اقول .. بس للأمانه ..!!
معاً : قول ..!!
المتعهد : على رأي المثل موت الحمير فرج للكلاب .. وعلى رأي المثل لولا الكاسوره ما عمرت الفاخوره .. لولا اللي بصير كان الناس تعطلت اعمالهم ..!!
الرجل : المستشفيات بتشتغل والاطباء بتسببوا ..!!
المرأه : ومراكز الأمن بتشوف شغلها والمحاكم والمحاميين وغيرهم ...!!!
المتعهد : والكراجات ، اقل عرس يتنصدم فيه كذا سياره ..!!
معاً : وهون بتصير حركه في البلد .. وبصير حراك اقتصادي..!!
الرجل : وفي النهايه طلعت نزلت كون وعامر ..!!
المرأه : انا بطلت اجوز ابني واذا ولا بد عالسكيت بلا حفله ..!!
المتعهد : ما بتقدري .. يقولوا الناس في ( إنّ ) والناس بدهم يستّروا ، وأهل العروس ما بقبلوا يحطوا بنتهم بالشبهة...!!
الرجل والمرأه : يعني لازم نساوي حفله..؟؟؟
المتعهد : او تشلحوا جلد المجتمع وتعيشوا معزولين ..!!!
الرجل والمرأه : لعاد بنعمل حفله ، أحسب قديش بطلعلك تندفع لك العربون ...!!
http://www4.0zz0.com/2010/03/27/12/668939012.jpg
الداعي بالخير
صالح صلاح شبانة
http://turath.mo5ayam.com/vb/index.php
منتديات سنجل الباسلة
الموقع الشخصي للكاتب والباحث صالح صلاح شبانة
هذا الرابط لموقع شخصي وخاص ، وهو محاكاة للتراث الشعبي حسب وجهة نظر الكاتب ، وقد يطلق عليه التأريخ الأبداعي ، وهو يختص بتراث القرية الفلسطينية من وجهة نظر أهل سنجل ، أرجو وأتمنى منكم عدم حذف الرابط بذريعة قوانين المنتدى ، وأرجو من القوانين القفز عن هذا الرابط لما فيه من تواصل بين أبناء الشعب الفلسطيني المهَجّرين ، ولكم التحية .
2017-07-09, 06:40 من طرف إدارة منتدى عائلة أبوهاشم
» عضو من عائلة أبو هاشم بمصر
2017-07-08, 18:28 من طرف Hany
» مربعانية الشتاء
2017-07-08, 08:59 من طرف إدارة منتدى عائلة أبوهاشم
» ونذرت شعري للمسرى
2017-07-08, 08:57 من طرف إدارة منتدى عائلة أبوهاشم
» عايد أبو فردة يشهر كتابه «ديوان السامر الفلسطيني»
2017-07-08, 08:54 من طرف إدارة منتدى عائلة أبوهاشم
» "وادي الكلاب".. خربة لا ترى النور ---- قرية الصرة
2017-07-08, 08:26 من طرف إدارة منتدى عائلة أبوهاشم
» طموح مواطنو قرية الصرة في دورا - الخليل
2017-07-08, 08:20 من طرف إدارة منتدى عائلة أبوهاشم
» دعاء لشهر ذي الحجة 1437
2016-09-03, 20:29 من طرف إدارة منتدى عائلة أبوهاشم
» صورة وجهاء عائلة أبو هاشم
2016-09-03, 19:53 من طرف إدارة منتدى عائلة أبوهاشم
» اثناء العمل ... فارس طه ابو هاشم
2016-09-03, 19:14 من طرف إدارة منتدى عائلة أبوهاشم