شوال الهم /9 رجل خير واصلاح

شوال الهم
مجموعة من المشاهد المسرحية الملتقطة من المجتمع المحلي
جمعها وصورها ووضعها بين دفتي كتاب
الداعي بالخير صالح صلاح شبانة
المشهد التاسع : رجل خير واصلاح
الممثل 2 : انا طبعاً حزين لأنه حلمي مات قبل ما اشوفه ، صدموني بالكنترول تبع ايام زمان ..!!
الممثل 1 : مش لأننا ضد الكنترول ومهنة الكنترول ، اي مهنه شريفه على راسنا من فوق..!!
الممثله : بس للأسف هذا الواقع اللي غالب على الغالبيه العظمى على اللي بمارسوا هذه المهنه ...!!
الممثل 2 : ومع ذلك خلونا نشوف هالمشهد التالي ..!!!
الممثل 1 : تصور انك تثق في واحد محترم وجيه اللهم لا حسد ، انت بتبعثه للإصلاح كون يفسد وبدل ما يحقن الدم ، يخليه للركب ، وبدل ما يرد الحردانه يطلقها ..، وبدل ما يزكيك بروح حاطط خنجر الغدر في ظهرك .. خلونا نشوف ..!!
الممثل 1 : ( يلبس عباءه وحطه وعقال ، يسحبان الكراسي .. يذهب الى الخارج )..!!
الممثل 2 : ( يجلس هو والممثله على الكراسي ) الله يرضى عليك يا يابا بيضي وجهنا ، العريس اللي جاي عريس لقطه ..!! والواسطه شيخ مشايخ .. لا تعزري علينا ..!!
الممثله : ولا يهمك يابا .. رح اخلي اعصابي جامده ..!!
( طرق على الباب ، يتهيآن )
الممثل 2 : ( ينهض ويتجه الى الباب ، يفتح ، مرحباً ) اهلاً وسهلاً .. اهلاً وسهلاً .. روحي انضبي يا بنت جوه ..!!
الممثله : ( تتجه الى الزاويه وتقف هناك )
يدخلان وهما يتبادلان الترحيب معاً ويجلسان ...!!!
الممثل 1 : شوف يا خوي يا ابو محمد ، مثل ما قال المثل خير الكلام ما قل ودل ، والوقت كالسيف ان لمْ تقطعه قطعك .. انا بدي اجيب من الآخر ..!!!
الممثل 2 : تجيب من مطرح ما بدك ، يا مرحبا فيك ويا هلا بك ، يا شيخنا انت ...!!!
الممثل 1 : انا جاي من جهة اخونا ابو علي ، هذا حابب يناسبك ..!!
الممثل 2 : يا ميت اهلا وسهلا فيك وفي ابو علي .. والله انتوا على راسي..!!!
الممثل 1 : يسلم راسك .. انا الصحيح زكيتك وقلت ابو محمد خير النسب..!!!
الممثل 2 : حلت البركه فيك وفيه ....!!!
الممثل 1 : انت بتعرف علي ابن اخونا ابو علي ، شب كُمّل ، علمْ وادب واخلاق وشخصيه بسم الله ما شاء الله ، يعني مثل الصحن الصيني من وين ما طقيته برن ...!!!
الممثل 2 : بسم الله ما شاء الله .. حلت البركه ..!!
الممثل 1 : وناس كرما يا ابو محمد ، يعني الكرم والجود بنقط منهم تنقيط ..!!
الممثل 2 : كل الناس خير وبركه .. بارك الله بارك الله ..!!
( تدخل الممثله وهي تحمل القهوه ) ( اهلا وسهلاً يا عمي ) ( تقدم الصينيه )..!!
الممثل 1 : ( يقف بسرعه ودهشه ) بسم الله ما شاء الله ، تبارك الخالق الذي خلق ..!!
الممثل 2 : ( باسماً ) خجلت تواضع البنت يا شيخ ..!!
الممثل 1 : بلا تواضع بلا شيخ بلا بطيخ اصفر .. ( يسرح )..!!!
الممثل 2 : مالك سرحت يا شيخ ؟ شو اللي جرى..؟؟!!
الممثل 1 : انا جاي هون بصفة ايش يا ابو محمد ؟؟!!
الممثل 2 : جاي تطلب ايد بنتي لعلي ابن ابو علي ..!!
الممثل 1 : ( باستنكار ) بنتك هذي الورده اللي بتحل عن حبل المشنقة لابن ابو علي ..!!!
الممثل 2 : وصار لك ساعه بتتغزل فيه وفي اخلاقه وفي اهله واصله وفصله ..!!
الممثل 1 : انا كذاب .. شيبتي هذي شيبه كذابه ( يرفع يداه ) يا رب اغفر لي.. يا رب اغفر لي..!!
هذا علي ساقط وابوه اسقط منه وكلهم عيله مثل قاع الكيله ..!!
الممثل 2 : ( بدهشه ) شو هالحكي يا شيخ ؟
الممثل 1 : ( وهو يدور حول الفتاه ) يا سلام !! معقول هالورده الفواحه يوخذها كلب مثل علي ؟ حرام ..حراااام.. ( يصرخ ) .. والله حرام !
الممثل 2 : شو اللي جرالك يا شيخ
الممثل 1 : داهيه توخذ الشيخ .. واللي بشوف هالحلا والجمال بظل فيه عقل..؟؟؟!!!
الممثله : ( بحياء ) .. عمو..!!
الممثل 1 : عمى الدبب اللي يعميني ويعمي علي وابوه في يوم واحد !! انا اطلبك لعلي..؟؟
الممثله : لعاد لمين ؟
الممثل 1 : ( مسترسلاً ) لعلي اللي ما بعرف كوعه من بوعه الساقط ابن الساقط ؟؟
الممثل 2 : ( بدهشه ) لعاد لمين ؟
الممثل 1 : ( مسترسلاً ) لعلي الكحيان ابن الكحيان اللي ريحته وريحة ابو طالعه؟؟
معاً : ( بدهشه ) لعاد لمين ؟
الممثل 1 : ( يهدأ فجأه ) ( يدور حولها ) انت بدك واحد يدفع من الواحد لنص المليون ..!! (مستدركاً ) ونص المليون ليش ؟ ليش ما هو مليون بحاله !
معاً ومين هالواحد ..؟؟
الممثل 1 : ( بهدوء ) انا .. انا اللي مستعد ..!!
معاً : ( بدهشه ) انت ؟
الممثل 1 : ( للممثل 2 ) مد ايدك بالصلا عالنبي وخلينا نقرا الفاتحه ..!!
الممثل 2 : ( بدهشه ) على ايش ؟
الممثل 1 : انك تجوزني بنتك على سنة الله ورسوله .. واطلب وتمنى ..!!!
الممثل 2 : ( للممثله ) شو رأيك يا يابا..؟؟
الممثله : ( ضاحكه ) على رأي المثل حمار تركبيه ولا حصان تقوديه ..!!
الممثل 1 : ( نقرا الفاتحه ) ؟
معاً : نقرأ .. يقرأون ....!!!

http://www4.0zz0.com/2010/03/27/12/668939012.jpg
الداعي بالخير
صالح صلاح شبانة

http://turath.mo5ayam.com/vb/index.php
منتديات سنجل الباسلة
الموقع الشخصي للكاتب والباحث صالح صلاح شبانة
هذا الرابط لموقع شخصي وخاص ، وهو محاكاة للتراث الشعبي حسب وجهة نظر الكاتب ، وقد يطلق عليه التأريخ الأبداعي ، وهو يختص بتراث القرية الفلسطينية من وجهة نظر أهل سنجل ، أرجو وأتمنى منكم عدم حذف الرابط بذريعة قوانين المنتدى ، وأرجو من القوانين القفز عن هذا الرابط لما فيه من تواصل بين أبناء الشعب الفلسطيني المهَجّرين ، ولكم التحية .