شوال الهم / 2 في سوق الخضار

شوال الهم
مجموعة من المشاهد المسرحية الملتقطة من المجتمع المحلي
جمعها وصورها ووضعها بين دفتي كتاب
الداعي بالخير
المشهد الثاني في سوق الخضار)
يقف الممثلون الثلاثه .. يحنون قامتهم للجمهور..
الثلاثه : وهلقيت مشهدنا الجاي مشهد من سوق الخضره ، والبياع اللي بظل يحلف أيمان طلاق على الطالعه والنازله ، ما بعرف الحلال من الحرام ، لسانه مبهدله وقالل قيمته ..!!
الممثله : وعن البياع اللي ما بعرف غير الطلاق والشقاق والنفاق ....!!
يأتون بفرش يوضع على طاوله صغيره ..
الممثل 1: ( ينادي ) دم الزغلول يابندوره ، اصابع البوبو يا خيار ، سواد الليل يا بيتنجان .. نضوجه وبتسوى عالبخار يا بطاطا .. بلديه يا زهره ..!!
الممثله : يصبحك بالخير يا خوي ..
البائع : ( غاضباً ) اهلاً .. تفضلي .. أسعار خيال ، بضاعة نخب اول ، علي الطلاق حرق أسعار ، عيشوا على قفانا ولا حدا حوّش..!!
المشتري : الله يقطعك ويقطع بضاعتك .. اللي كلها براره من زبالة السوق..!!
البائع : ( غاضباً ) عليّ الطلاق ما بتعرف طعم ثمك ولا نمرة رجلك ..!!
الممثلة : وبيش البندوره ؟
البائع : عليّ الطلاق بربع دينار الكيلو .. تفاح .. شوفي ؟؟؟
الممثله : يا زلمه حرام عليك .. بندوره ريحتها طالعة وبتحلف بالطلاق انها تفاح..!!
المشتري : (ساخراً ) قصده انه تفاح مخمج .. شغل صناعة خل ، وهو التفاح يعني معصوم عن الريحه العاطله والتخميج؟؟
البائع : عليّ الطلاق لا انت بتفهم ولا هي بتفهم ..!!
المشتري : ( غاضباً ) كلمه زياده بغط راسك فيهن وبمعسك في ارض هالحسبه ، لما أخلي غراب البين يمعسك ، ترى أنا عقلي هوا وإيدي فِرطَه...!!!!
البائع : ( يرفع ايده ويغمضها على هيئة لكمة ) وعليّ الطلاق لأفلع راسك في عيارة الكيلو ، واخلي نمل البلد يشبع من دمك ومن لحمك اللي بدي افرمه كفته ..!!!
الممثله : يا زلمه حرام عليك .. انت ليش نازل بإيمان الطلاق ؟ مش مسلم انت ؟ ما بتأمن بالله ؟ ما بتعرف الحلال من الحرام ، على هالحاله كل ذريتك اولاد حرام الله يعافينا ؟
البائع : ( بغضب ) عليّ الطلاق اني احسن منك ومنه وعلي الطلاق اني مؤمن بالله اكثر منك ومنه .. وعليّ الطلاق اذا ما رحتوا من قدامي لانعف هالخضريات على راسك وراسه .. وارتكب اليوم جريمه ..!!
المشتري : (وهو يغادر ) يا زلمه روح .. الله يلعن الساقط ويلعن شوفته ..!!
البائع : ( مهدداً ) عليّ الطلاق ما في ساقط غيرك ..!!
الممثله : أجّرم عنك بضاعتك خربانه وبراره .. لأنك مش كويس ما حدا بقربك ( تذهب )
البائع : ( لوحده ) عليّ الطلاق اني احسن منك ومنه ..( ينادي) : دم الزغلول يا بندوره .. اصابع البوبو يا خيار ، علي الطلاق يا ناس ما في أحسن من بضاعتي ، ولا أحسن من أخلاقي ، بس الرزقه محجوبه عني ..!!!
المشتري : ومثل ما شفنا في المشهد اللي فات ايمانه باطلة غموس .. ومرته الله يرحمها برحمته عايشه على ذمته وهي شرعاً مش على ذمته ..
الممثله : وكأنها الست سلعه عند امثاله .. وكأنها ما هي شريكة حياته ولا ام عياله ..
الممثل البائع : ومش هيك وبس .. بضاعته بتظل بوجهه .. وبشكي من الطفر والفقر ..
يا عمي التجاره بدها اخلاق .. بعدين وين راحت مقولة الزبون على حق ؟
الثلاثه : ( يضحكون ) .. راحت مع السبت
موسيقى ، تعتيم المسرح...!!

http://www4.0zz0.com/2010/03/27/12/668939012.jpg
الداعي بالخير
صالح صلاح شبانة

http://turath.mo5ayam.com/vb/index.php
منتديات سنجل الباسلة
الموقع الشخصي للكاتب والباحث صالح صلاح شبانة
هذا الرابط لموقع شخصي وخاص ، وهو محاكاة للتراث الشعبي حسب وجهة نظر الكاتب ، وقد يطلق عليه التأريخ الأبداعي ، وهو يختص بتراث القرية الفلسطينية من وجهة نظر أهل سنجل ، أرجو وأتمنى منكم عدم حذف الرابط بذريعة قوانين المنتدى ، وأرجو من القوانين القفز عن هذا الرابط لما فيه من تواصل بين أبناء الشعب الفلسطيني المهَجّرين ، ولكم التحية .